أخبار عاجلة
الرئيسية / تعليم و جامعات / ياسر الصاوى يكتب ….رسالة إلى وزير التعليم

ياسر الصاوى يكتب ….رسالة إلى وزير التعليم

سيدي الوزير / بعد الاطلاع على بيانكم الجهنمي غير المدروس بالأمس والذي حاولنا بكل صعوبة تفسيره وتوضيحه للناس وللطلاب أود الحديث معكم عن عدة نقاط لا تعلمها ولا أحد من مستشاريك الجهابذة الذين يجلسون في مكاتبهم المكيفة يعلمونها.
أولا: أنتم تخاطبون بهذا البيان فئة معينة من الطلاب يدرسون في المدارس الدولية والمدارس الخاصة الذين يمتلكون الإمكانات اللازمة لتنفيذ ماتطلبه في البيان من نت شديد السرعة وتليفونات حديثة يتعدى سعرها آلاف الجنيهات وباقات نت متعددة وطويلة المدى ويمكنهم تجديدها كل أسبوع لو أرادوا.
ثانيا: معظم طلاب المدارس الحكومية لا تتوفر لهم هذه الامكانات خاصة في تلك الظروف العصيبة التي تمر بها البلاد والتى وقفت حال الناس وأصبح الترفيه بالنت والفسح أمرا صعبا وصار هم ولي الأمر المسكين أن يبحث عن قوت عياله بصعوبة وأحيانا يبيت هو وعياله دون عشاء يعني لو معاه مثلا 100 جنيه هايأكل بيهاعياله مش هايوصل بيها نت.
ثالثا: نيجي بقى للمدرسة حضرتك عاوز تعمل منصة تعليمية داخل المدرسة تربط بين المعلم والطالب .. طيب ازاي هو حضرتك مش عارف إن المعلمين هم الذين ينفقون على المدرسة من صيانة حمامات إلى إصلاح مقاعد حتى النت لو وجد بيكون وصلة أهالي باقة كده على القد علشان الشغل الإداري فقط بخمسين جنيه بيدفعوا اشتراكها من جيوبهم….. سيدي الفاضل معظم المدارس لا يوجد بها نت أصلا.. حتى التليفونات الأرضي مش شغالة لأن ببساطة الفاتورة لم تدفع من سنوات.
رابعا: نيجي بقى للطالب اللي سيادتك لبسته في الحيط وبقى تايه فيه امتحان؟…. لا يا حبيبي.
شكرا يا عمو الوزير ربنا يخليك يعني احنا كده نجحنا…. الله
لا يا بابا استنى بس رايح فين… أنت هاتعمل بحث أو مشروع تخرج.
سهلة يا عمو نجيبوا من على النت.
اصبر بس يا حبيبي خليني أكمل ماتضيعش الكلمتين اللي حفظتهم علشان أطلع أقولهم على الهوا.
اتفضل يا عمو……… بص ياحبيبي هو مش بحث بحث هو امتحان الكتروني موجود على المنصة الالكترونية ويقيس المستويات العليا في التفكير يعني هاتذاكر في البيت بدل ماتروح المدرسة بس أنا مش عاوز أقول امتحان الكتروني علشان الناس مش تهيج عليا وتقولي أنت حولتنا زي نظام أولى وتانية ثانوي.
عموا روووووح إلهي……………… مشروع إيه وبحث إيه اللي يغني عن الامتحان أنت كده أثبت أنت والجهابذة اللي معاك إنكم ماتعرفوش ألف باء تقييم…….الامتحان يا باشا هو وسيلةتقييم الطالب فيما درسه وتعلمه وكونك تلغيه وتستبدله بمشروع يبقى أنت كده دمرت جانب من جوانب العملية التعليمية اللي هدفهامن الأساس قياس مدى ماحصلهالطالب وماتعلمهمن خلال الدروس……يعني باختصار قياس نواتج التعلم من خلال المعطيات.
خامسا: حضرتك والوزارة في وادي والطالب اللي قعد من المذاكرة وولي أمره اللي فرح ببيانك من غير مايفهم أغراضه الخفية في وادي والمعلم والمدرسة في وادي تالت….. وأحب أبشرك مفيش مدرسة هاتنفذ الكلام ده وعاوز تنفذ وفر الامكانات لأن المعلم مش هايدفع من جيبه.. وكفايه اللي دفعه. لأنه هو كمان ولي أمر وعنده عياله اللي عاوز يأكلهم ويشربهم يعني بعد ما اتوقف حاله ماعندوش استعداد يصرف على الوزارة.
سادسا: المفروض الوزارة تكون مجهزة خطط وخطط بديلة يعني كذا سيناريو زي مدرب الكورة كده لو حصل كذا هانعمل كذا ويعلن الأمر بكل وضوح وشفافية علشان الناس تبقى على نور……. تقدر تقولي لو لا قدر الله و الفيروس تفشى ايه مصير تالتة إعدادي وتالتةثانوي؟
طيب لو ربناسهل وقدرنا بعون الله نسيطر على المرض أكيدالطلاب هايرجعوا تاني المدارس هايكون مصير الامتحان الإلكتروني ده إيه؟ وهل الطالب هايعودللامتحان الورقي ولا لا؟
سابعا: الأفضل كان إبقاء الوضع كما هو عليه حتى ماقبل انتهاء الأسبوع الثاني فإذا لا قدر الله والمرض مازال لم يتم السيطرة عليه يمد تأجيل الدراسةأسبوع ثم أسبوعين لو احتاج الأمر. وعندما يتم السيطرة عليه يتم إصدار قرار بعودةالطلاب إلى مدارسهم مع أخذ الاحتياطات اللازمة ويراعي حذف منهج أبريل عن طلاب النقل حتى تالتة إعدادي……أما بالنسبةلطلاب الشهادات العامة كالدبلومات و تالتة ثانوي يراعي التخفيف من منهج أبريل مع تأجيل الامتحانات لكل الصفوف لمدة أسبوعين لتدارك شرح المقررات ومراجعتها بما في ذلك الشهادات العامة.
حضرتك عايش في عالم من نسج خيالك وتناسيت الواقع المرير …….كل اللي أنت عاوز تثبته لنفسك وللناس إن النظام الجديد نظام ناجح وهايطبق هايطبق رغم أنف الجميع.

عن admin

شاهد أيضاً

التعليم : غدا الإعلان عن نتيجة الصفين الأول والثانى الثانوى على موقع الوزارة

تعلن غدا السبت وزارة التربية والتعليم والتعليم الفنى، نتيجة امتحان الفصل الدراسى الثانى لطلاب الصفين …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *